रूससँग शक्तिशाली नयाँ क्षेप्यास्त्रहरूको भण्डार प्रयोगका लागि तयार रहेको राष्ट्रपति भ्लादिमिर पुटिनले बताउनु भएको छ । युक्रेनी शहर ड्निप्रोमा नयाँ ब्यालेस्टिक क्षेप्यास्त्र प्रहार गरेको भोलिपल्ट पुटिनबाट यो भनाई बाहिर आएको हो ।

रूसी नेताले ओरेश्निक नामक क्षेप्यास्त्रलाई रोक्न नसकिने बताएका छन् । थप परीक्षण गरिने वाचा समेत गरेका छन् ।

ओरेश्निकको प्रयोगले यस हप्ता युद्धमा भएको तनावलाई उच्च तहमा पुराएको छ । जसमा युक्रेनले पहिलो पटक अमेरिकी र बेलायती क्षेप्यास्त्रहरू रूसतर्फ प्रहार गरेको थियो ।

युक्रेनी राष्ट्रपति भ्लोदिमिर जेलेन्स्कीले विश्व नेताहरूसँग आग्रह गर्दै पुटिनलाई आफ्ना कामहरूको वास्तविक परिणाम महसुस गराउने गरि प्रतिक्रिया दिन माग गर्नुभएको छ ।

पश्चिमी साझेदारहरूबाट नयाँ वायु रक्षा प्रणाली उपलब्ध गराउन आग्रह गरिरहेको उहाँले बताउनु भएको छ ।

अमेरिकी टर्मिनल हाई एल्टिच्युड एरिया डिफेन्स प्रणाली प्राप्त गर्न वा आफ्नो प्याट्रियट एन्टि ब्यालेस्टिक मिसाइल प्रणाली अद्यावधिक गर्न युक्रेनले प्रयास गरिरहेको छ ।

पुटिनले ओरेश्निक हाइपरसोनिक क्षेप्यास्त्रहरू ध्वनिको गति भन्दा १० गुणा छिटो उड्ने बताउनु भएको छ । क्षेप्यास्त्रको प्रयोगलाई युक्रेनले स्टर्म श्याडो र एटकम्स क्षेप्यास्त्र प्रयोग गरेको प्रतिक्रियाको रूपमा प्रस्तुत गरिएको छ ।

ड्निप्रोमा भएको आक्रमणलाई प्रत्यक्षदर्शीहरूले असामान्य बताएका छन् । यस आक्रमणमा भएका विस्फोटहरू तीन घण्टासम्म जारी रहेका थिए ।

अमेरिकी राष्ट्रपति जो बाइडेनले युक्रेनलाई रूसभित्रका लक्ष्यमा प्रहार गर्न लामो दूरीका एटकम्स क्षेप्यास्त्र प्रयोग गर्न अनुमति दिएको बताउनु भएको छ ।

फेब्रुअरी २०२२ मा रूसले युक्रेनमा पूर्ण मात्राको आक्रमण सुरु गरेको थियो । अहिले दुबै देशले जनवरीमा डोनाल्ड ट्रम्प अमेरिकी राष्ट्रपति बन्नुअघि युद्धभूमिमा लाभ उठाउने प्रयास गरिरहेका छन् ।

ट्रम्पले युद्ध केही घण्टामा अन्त्य गर्ने वाचा गरे पनि कसरी भन्ने बारे विवरण दिनुभएको छैन ।

Source : https://www.khasokhas.com/211783