काठमाडौं । यतिबेला संगीतकार तथा गायक कालीप्रसाद बासकोटा दैनिक गायन अभ्यासमा व्यस्त छन् । उनी आफ्नो सांगीतिक करियर १५ वर्ष पुगेको अवसरमा पोखरा र बुटवलमा प्रस्तुत हुँदैछन् । सोही प्रस्तुतिको लागि यतिबेला आफु अभ्यासमा व्यस्त भएको गायक बासकोटाले राजधानीलाई बताए । नवीन शैलीका गीत गाउन र तयार पार्न रुचाउने कालीप्रसाद आफ्नो व्याण्ड साथीभाइसहित पोखरा र बुटवलमा गुञ्जन लागेका पनि जनाएका छन् ।

उनी आफ्नो प्रस्तुतिको लागि विहिवार नै पोखरा लाग्दैछन् । गायक बासकोटा र उनको व्याण्ड साथीभाई शुक्रबार पोखराको लेकसाइडमा अवस्थित किङ्स लाउन्ज पोखरामा एकल सांगीतिक प्रस्तुती दिने भएको छ । आफु र आफ्नो व्याण्डको यस वर्षको यो तेस्रो सिजनको प्रस्तुती भएको पनि उनले बताएका छन् ।

किङ्स लाउन्ज पोखराले पनि बासकोटाका प्रसँसकबाट उनका गीतहरुको सुची तयार गरेर त्यसमा अभ्यासको लागि अनुरोध गरेको जनाएको छ । पोखरामा उनलाई सुन्ने चाहना दर्शकबाट आएपछि यो कार्यक्रम राखेको पनि सो लाउन्जले जनाएको छ ।

बासकोटा र उनको व्याण्डले पोखरापछि शनिबार बुटवलको द कन्सेप्ट क्लब एण्ड पबमा आफूलाई प्रस्तुत गर्नेछ । पोखरा र बुटवलमा बासकोटा र उनको व्याण्डले उनले ‘निर जहिल्यै रिसाउनी’, ‘अजम्बरी लाउला पिरती’, ‘माया रैछ र भर रैछ नि’ र ‘जीवन जात्रा हो’ लगायतका लोकप्रिय गीत सुनाउने भएका छन् ।

पोखरा र बुटवलपछि बासकोटा र उनको व्याण्डले चाँडै नै सुनसरी, झापा, चितवनलगायतका स्थानमा कन्सर्ट प्रस्तुत गर्नेछन् । यसअघि उनीहरुले काठमाडौंसहित ललितपुर, मोरङ, सुनसरी, धनकुटा र भोजपुरमा प्रस्तुती दिइसकेका छन् ।

‘यो सांगीतिक यात्रा मेरो व्यक्तिगत उपलब्धिलाई मात्र उत्सवका रुपमा मनाउँदै छैन, यसले नेपाली संगीतको वृत्ति विकासलाई पनि उजागर गर्नेछ ।’ बासकोटाले भने,‘हाम्रो सांगीतिक यात्राले प्रसँसकबीच पुराना र नयाँ गीत पस्कनेसँगै मेरो यात्रा, करियर, गीत सिर्जनाका अविष्मरणीय क्षणलाई दर्शकमाझ प्रस्तुत गर्नेछ’।

कालीप्रसादको नेपाल टुरको व्यवस्थापन पीभीई नेटवर्कले गर्नेछ । नेटवर्कले चार वर्षदेखि काली प्रसाद र उनको व्याण्डको व्यवस्थापन हेर्दै आएको छ,‘आफ्नो नवीन शैलीका लागि परिचित कालीप्रसादले नेपाली सम्पदाका समृद्ध तत्वहरुसँग समसामयिक ध्वनिहरु मिसाएर नेपाली फिल्मका संगीतलाई पुनः आकार दिएका छन् । उहाँका गीत परिवारदेखि समाज हुँदै राष्ट्र र अन्तर्राष्ट्रिय क्षेत्रमा लोकप्रिय छन् ।’ पीभीई नेटवकका विकेश कायस्थले भने, ‘उहाँको १५ वर्षे करियरको उत्सवमा हातेमालो गर्न पाउँदा हामी उत्साहित छौं’।

The post शुक्रबारबाट कालीप्रसादको सांगीतिक यात्रा appeared first on राजधानी राष्ट्रिय दैनिक (लोकप्रिय राष्ट्रिय दैनिक)-RajdhaniDaily.com - Online Nepali News Portal-Latest Nepali Online News portal of Nepali Polities, economics, news, top stories, national, international, politics, sports, business, finance, entertainment, photo-gallery, audio, video and more....

Source : https://rajdhanidaily.com/id/103803/