अमेरिकाले इरानबाट इजरायलतर्फ प्रहार भएका दर्जनौँ ब्यालिस्टिक मिसाइलहरूलाई रोकेको बताएको छ । पेन्टागनले इरानले प्रहार गरेको मिसाइललाई रोक्न लगभग एक दर्जन इन्टरसेप्टरहरू प्रहार गरेको जनाएको हो ।

अमेरिकी राष्ट्रपति जो बाइडेनले आफ्नो निर्देशनमा अमेरिकाले सक्रिय रूपमा इजरायलको रक्षा गरेको बताउनु भयो । उहाँले बिहानै सुरक्षा सम्बन्धी महत्त्वपूर्ण मामिलाहरू समाधान गर्न व्हाइट हाउसको सिचुएसन रूममा समय बिताएको बताउनु भयो ।

इजरायली सेनाले इजरायलतर्फ लगभग १८० मिसाइल प्रहार गरिएको जानकारी दिएको छ । जसको अधिकांशलाई इन्टरसेप्ट गरिएको छ ।

इरानी राष्ट्रपति मसौद पेसेश्कियानले यस हमलालाई निर्णायक भन्दै इरानी नागरिक र स्वार्थको बचाउमा भएको प्रतिक्रिया दिनुभएको छ ।

मंगलबारको पेन्टागन प्रेस ब्रिफिङमा मेजर जनरल प्याट्रिक राइडरले दुई अमेरिकी नेभी विध्वंसकहरूले ती मिसाइलहरू रोक्न इन्टरसेप्टर प्रहार गरेको बताउनु भयो ।
इरानले इजरायलतर्फ लगभग १८० मिसाइल प्रहार गरेको इजरायली सेनाले जनाएको छ । यो अप्रिलमा इरानले ११० ब्यालिस्टिक मिसाइल र ३० क्रुज मिसाइल इजरायलतर्फ प्रहार गरेको घटनाभन्दा ठूलो रहेको उल्लेख गरिएको छ।

राष्ट्रपति बाइडेनले अमेरिकाले इजरायलको पूर्ण समर्थन गरेको उल्लेख गर्नुभयो । पत्रकारहरूले इरानप्रति कस्तो प्रतिक्रिया जनाइने छ भनेर सोध्दा, बाइडेनले सक्रिय छलफलको विषय भएको तर अन्तिममा हामीले के गर्नुपर्ने हो त्यो निस्कर्ष निकाल्छौँ भन्नुभयो ।

अमेरिकी विदेश मन्त्रालयका प्रवक्ता म्याथ्यु मिलरले वाशिङ्टनले गाजा र आसपासको क्षेत्रलाई शान्त बनाउन प्रतिरोध र कूटनीति प्रयोग गर्न खोजिरहेको बताउनु भयो ।

Source : https://www.khasokhas.com/210350