फाइनलको टिकट ‘सोल्ड आउट’, महानगरले तीन ठाउँमा लाइभ देखाउने
काठमाडौं – साफ महिला च्याम्पियनसिप २०२४ को फाइनल खेलको टिकट विक्री सुरु भएको एक घण्टा नबित्दै सकिएपछि काठमाडौं महानगरले काठमाडौंका ३ स्थानमा ठूलो स्क्रिनमा खेल देखाउने भएको छ ।
एन्फाले विहान ८ बजेदेखि २ स्थानबाट टिकट विक्री गर्ने सूचना निकालेसँगै विहान ४ बजेदेखि नै भद्रकालीस्थित आर्मी गेटको काउन्टर र जावलाखेलस्थित फुटबल मैदानमा दर्शक उपस्थित थिए । विहान ८ बजे भनेपनि व्यवस्थापकीय कमजोरीका कारण ९ बजेपछि मात्र टिकट विक्री सुरु भएको थियो । झन्डै डेढ घण्टामै विक्री गर्न ल्याइएको टिकट सकिएको थियो ।
टिकट सोल्ड आउट भएपनि हजारौंको संख्यामा दर्शक टिकट खरिद गर्न आएका थिए । यसलाई मध्यनजर गर्दै काठमाडौं महानगरले राजधानीको ३ स्थानमा खेल देखाउने भएको छ । राजधानीको टुडिखेल, सानो गौचरनको खेल मैदान र चाबहिल गणेशस्थानमा खेल देखाइने महानगरले जानकारी दियो ।
नेपाल र बंगलादेशबीच दशरथ रंगशालामा बुधवार साँझ ६:३० बजे फाइनल सुरु हुँदैछ । एन्फाले मंगलवार पत्रकार सम्मेलनमार्फत साविक टिकट विक्री गर्दै आएको माउन्ट एभरेष्ट स्पोर्ट्स एण्ड इभेन्ट्सबाट अधिकार खोसेर २ ठाँउमा आफैं टिकट बेच्ने बताएको थियो ।
The post फाइनलको टिकट ‘सोल्ड आउट’, महानगरले तीन ठाउँमा लाइभ देखाउने appeared first on Samudrapari.
