अमेरिकामा आर्थिक बर्ष २०२५ का लागि ६६ हजारका अतिरिक्त ६४ हजार ७ सय १६ गैर कृषि अस्थायी कामदार भिसा उपलब्ध गराइने अमेरिकाको डिपार्टमेन्ट अफ होमल्याण्ड सेक्युरिटीले घोषणा गरेको छ ।   संसदले हरेकबर्षका लागि तोकेको कोटा ६६ हजार भएतापनि २०२५ का लागि थप भिसाहरु पनि उपलब्ध हुनेछन् ।

आतिथ्य, पर्यटन, ल्याण्डस्केपिङ, समुद्री खाना प्रशोधन र मौसमी वा अन्य अस्थायी काममा अमेरिकी व्यवसायहरुमा विदेशी कामदारहरु ल्याउनका लागि एच टु बी भिसाको प्रयोग गरिन्छ । पूरक भिसा विनियोजनले धेरै कम अमेरिकी कामदारहरू उपलब्ध हुने क्षेत्रमा मौसमी वा अन्य अस्थायी कामदारहरूको आवश्यकतालाई सम्बोधन गर्दै अमेरिकी अर्थतन्त्रमा योगदान पुर्याउन मद्दत गर्ने अपेक्षा गरिएको छ ।

एच टु बी भिसा विस्तारले अनियमित माइग्रेसनको विकल्पको रूपमा वैध मार्गहरू विस्तार गर्ने बाइडेन प्रशासनको प्रतिज्ञालाई प्रतिबिम्बित गरेको छ । आर्थिक बर्ष २०२४ को सुरुमा यी पूरक भिसाहरू उपलब्ध गराउने योजनाहरू घोषणा गरेर डिपार्टमेन्ट अफ होमल्याण्ड सेक्युरिटीले कामदार आवश्यकता भएका अमेरिकी व्यवसायहरूले अग्रिम योजना बनाउने र उनीहरूलाई चाहिने मौसमी र ​​अन्य अस्थायी कामदारहरू फेला पार्न सक्षम हुने सुनिश्चित गर्नेछ ।

पुरक कामदार भिसा मध्ये २० हजार भिसा कोलम्बिया, कोस्टारिका, इक्वेडर, एल साल्भाडोर, ग्वाटेमाला, हाइटी र होन्डुरसका कामदारहरूलाई छुट्याइने अपेक्षा गरिएको छ। त्यस्तै ४४ हजार ७ सय १६ पुरक भिसाहरु विगत ३ बर्षको अवधिका कुनै बर्षमा एच टु बी भिसा प्राप्त गरेका वा अहिले प्राप्त गरेका फर्केर आउने कामदारहरुलाई उपलब्ध गराइनेछ । आर्थिक वर्षको पहिलो आधा र दोस्रो आधा बीचमा फर्किने कामदारहरूको लागि यी पूरक भिसाहरू प्रदान गरिनेछ । खासगरी समरमा कामदारहरूको माग पूरा गर्नका लागि यी भिसाहरुको प्रयोग गरिनेछ ।

अस्थायी कामदार भिसा एच टु कार्यक्रमहरूले निश्चित अमेरिकी रोजगारदाता वा एजेन्टहरूलाई अस्थायी कामहरू भर्नका लागि विदेशी नागरिकहरूलाई अमेरिकामा ल्याउन अनुमति दिन्छ । पर्याप्त अमेरिकी कामदारहरू नभएकाहरुले अस्थायी काम गर्न सक्षम, इच्छुक, योग्य र उपलब्धहरुलाई अमेरिका ल्याउन सक्छन् । रोजगारदाता वा एजेन्टले सम्भावित कामदारको तर्फबाट गैरआप्रवासी कामदारको लागि निवेदन फारम आई १२९ फाइल गर्नुपर्छ ।

साथमा योग्य अमेरिकी कामदारहरू रोजगारीको अवसर भर्न उपलब्ध नभएकाले विदेशबाट ल्याउनुपरेको लेबर डिपार्टमेन्टको प्रमाणीकरण गर्नुपर्छ । विदेशी कामदारको रोजगारीले अमेरिकामा समान रूपमा कार्यरत कामदारहरूको ज्याला र कामको अवस्थालाई प्रतिकूल असर नपार्ने पनि प्रमाणिकरण गर्नुपर्छ ।

Source : https://www.khasokhas.com/211600