भगवान बुद्घको जन्मस्थल लुम्बिनीमा पछिल्ला वर्षहरुमा अमेरिकी पर्यटकको आर्कषण बढ्दो छ ।

लुम्बिनी विकास कोषको सूचना शाखाको तथ्याङ्कले सन् २०२३ र २०२४ मा अघिल्ला वर्षहरुको तुलनामा अमेरिकी पर्यटकको आगमन बढेको देखाएको छ ।

लुम्बिनी विकास कोषको प्रमुख सूचना अधिकृत डा. हरिध्वज राइले पनि विगतका वर्षका तुलनामा पछिल्ला वर्षहरुमा लुम्बिनीमा अमेरिकी पर्यटक आगमन बढेको बताए ।

कोषको तथ्याङ्क अनुसार सन् २०२३ मा १ हजार ६ सय ७८ जना अमेरिकी पर्यटकले लुम्बिनी भ्रमण गरेका थिए भने सन् २०२४ को अक्टोवर महिनासम्ममा १ हजार २ सय ३१ जना अमेरिकी पर्यटकले लुम्बिनी भ्रमण गरेका छन ।

त्यस्तै सन् २०२२ मा कुल जम्मा ९ सय २४ जनाले लुम्बिनी भ्रमण गरेका थिए, भने २०२१ मा जम्मा १ सय ४० जनाले लुम्बिनी भ्रमण गरेका थिए । सन् २०२० मा यो संख्या ४ सय ६५ थियो ।

प्रमुख सूचना अधिकृत डा.राइले लुम्बिनीमा अन्य देशहरुको जस्तै अमेरिकाको पनि आफ्नै मन्दिर स्थापना हुने हो भने अमेरिकी पर्यटक आगमन थप बढ्ने अनुभव समेत बताए । यसकालागि अमेरिकाबाट कोषसँग जग्गा माग भएमा उपलब्ध गराउन सकिने डा.राइले स्पष्ट पारेका छन् । अमेरिकी पर्यटक गुणस्तरीय र खर्च गर्ने प्रकृतिका मानिने अनुभव समेत राइले बताए ।

लुम्बिनीमा तेस्रो मुलुक श्रीलङ्का,चीन,थाइल्याण्ड,कम्बोडिया,कोरिया र म्यानमार आदी बौद्ध धर्मावलम्वी देशका पर्यटक ठूलो संख्यामा आउँछन । ति देशहरुको लुम्बिनीमा आ–आफ्ना छुट्टाछुट्टै मन्दिर पनि रहेका छन ।

बुद्ध जन्मस्थल लुम्बिनीको प्रचार प्रसार एवं आवागमनको सहज वातावरण र स्थानीय स्तरमा राम्रो पर्यटकीय पूर्वाधारको व्यवस्था गर्न सकिएमा अमेरिकाबाट लुम्बिनीमा ठूलो संख्यामा पर्यटक आउन सक्ने सम्भावना रहेको प्रमुख सुचना अधिकृत राइको धारणा छ ।

लुम्बिनीमा बुद्धको माता मायादेवीको मन्दिर, बुद्ध जन्मस्थलको चिनो स्वरुप राखिएको ढुङ्गा अर्थात मार्कर स्टोन, अशोक स्तम्भ, विभिन्न पुरातात्विक सामग्रीहरु,सङ्ग्रहालय, पुस्तकालय, विभिन्न देशका गुम्बा र मन्दिरहरु, नहर, शान्ती दीप आदी दर्शनीय सम्पदा छन ।

सन् २०२३ मा तेस्रो मुलुकका राहदानी वाहक कुल ७६ हजार २ सय १० जना, भारतीय २ लाख ६६ हजार ५ सय १० जना र ६ लाख ५६ हजार २ सय १८ जना आन्तरिक पर्यटकले लुम्बिनी भ्रमण गरेको तथ्याङ्क छ । सन् २०२४ मा पनि पर्यटक आगमन दर उत्साहजनक रहेको बताइएको छ ।

Source : https://www.khasokhas.com/211412