गाजामा लडेका इजरायली डिफेन्स फोर्सका भेट्रानहरु नेपालमा हाइकिङमा गइरहेका छन् । घाइते पूर्व इजरायली सिपाहीहरू नेपालको अन्नपूर्ण हिमालमा पदयात्रामा देखिएका हुन् । यस्तै ३० जनाको एउटा समुह नेपालको अन्नपूर्ण हिमाल १० दिनसम्मको पदयात्रा गर्ने योजनामा छ ।

३० जना इजरायली सेनाका भेट्रानहरुमध्ये अधिकांश गाजामा लडाइँमा भएकाहरु हुन् । उनीहरुले महिनौंको उपचारपछि अहिले विभिन्न शारीरिक अपाङ्गताका साथ बाँचिरहेका छन्। इजरायल हमास युद्धको पृष्ठभूमिमा हजारौं इजरायली डिफेन्स फोर्सका सैनिकहरू शारीरिक र मनोवैज्ञानिक रूपमा घाइते छन् । सन् २०२३ को जुलाई यतामात्र यो संख्या लगभग १० हजार छ । घाइतेमध्ये आधा ३० वर्ष मुनिका छन्। २०२४ को अन्त्यसम्ममा मृत्यु हुनेको संख्या १४ हजार पुग्न सक्छ।

यस वर्षको नेपाल पदयात्रा इरेज फाउन्डेसनले आयोजना गरेको आठौं वार्षिक पदयात्रा हो । यो अहिलेसम्मकै सबैभन्दा ठूलो हो, जसमा ९७ जना सहभागी छन्। यस वर्षको समूह ठूलो भएकाले विभिन्न समूहहरूमा विभाजित छन् ।

३४ जना सहभागीहरू केही दिन अघि नै यात्रा सुरु गर्न प्रस्थान गरिसकेका छन् । जसमा छ जना नेपाली गाइडहरू, तीन डाक्टरहरू, एक थेरापिस्ट र साथीहरू वा नजिकका परिवारका सदस्यहरू छन् । प्रत्येक बर्ष अन्नपूर्ण पदयात्रामा जान चाहने शारीरिक अपाङ्गता भएकाहरुको सहभागिता र माग बढ्दै गएको छ।

पहिलो समूह यसअघि नै पदयात्रा सुरु गर्न प्रस्थान गरिसकेको छ । पाँच दिनसम्म आरोहणपछि समूहले मनाङको यात्रा गर्नेछ र दुई रात ३,५४० मिटरको उचाइमा बस्नेछ। तिनीहरूका लागि त्यहाँ विशेष गतिविधिहरू योजना गरिएको छ ।

सप्ताहन्त पछि तिनीहरू ४०५० मिटरको उचाइमा चढ्न जारी राख्नेछन् । र सोमबार ४५ सय मिटरमा पुगेर संगीत वाद्ययन्त्र र गीतहरूका साथमा सााझ भेला हुनेछन्। त्यसपछि उनीहरु ४,९०० मिटरको उचाइमा रहेको हाई क्याम्पमा पुग्नेछन्।

भोलिपल्ट समूहको एक भाग बिहान ४ बजे उठेर ५,४०० मिटरभन्दा अग्लो विश्वको सबैभन्दा अग्लो बाटो मध्येको थोरुङला पासमा चढ्नेछ। त्यसपछि उनीहरु फर्कन थाल्नेछन् । टोलीका साथीहरू र इजरायली स्वयंसेवकहरूसँगै छ जना नेपाली गाईडहरूले दुर्गम भूभागका लागि अनुकूलित विशेष ह्वीलचेयरहरू र यी सहभागीहरूलाई ट्रेकको निश्चित भागहरूमा लैजान मद्दत गर्नेछन्।

केही सहभागीहरूले अंगविच्छेदन र टाउकोमा चोटहरू सहित गम्भीर चोटहरू सामना गरिरहेका छन्। डिसेम्बरमा भएको विष्फोटबाट गम्भीर घाइते भएका एकजना जसको दाहिने हात र देब्रे खुट्टामा चोट लागेको थियो, उनीपनि पदयात्रामा छन् । उनको १३ घण्टा शल्यक्रिया गरिएको थियो। शल्यक्रियाको १० घण्टापछि चिकित्सकले उनको देब्रे खुट्टा काट्नुपर्ने बताएका थिए । तर उनको खुट्टा बचाउने प्रयासका लागि परिवारको जिद्दी पछि थप तीन घण्टाको शल्यक्रिया गरिएको थियो, जसका कारण खुट्टा काट्नुपरेन ।

अन्नपूर्ण पदयात्रा संसारको सबैभन्दा प्रसिद्ध मध्ये एक हो तर सबैभन्दा चुनौतीपूर्ण पनि छ । सन् २०१४ मा हिमपहिरोका कारण इजरायली पदयात्रीहरूको मृत्यु भएको थियो भने अन्य केही दुखद दुर्घटनाहरू समेत भएका छन् । उडान रद्द हुने र समस्याग्रस्त मौसमको सामना गर्नुपर्ने त सामान्य नै हो ।

Source : https://www.khasokhas.com/210734