जोडी कमर संसारकै सुन्दर
एजेन्सी ।
बेलायती अभिनेत्री जोडी कमर संसारकै सबैभन्दा सुन्दर महिला घोषित भएकी छन्। भौतिक पूर्णता मापन गर्न ग्रीक समयको गोल्डेन रेसियो प्रविधि प्रयोग गरी हरेक वर्ष सार्वजनिक गरिने सुन्दर महिलाको सूचीमा यस वर्ष जोडीको नाम पहिलो नम्बरमा आएको हो।
व्यावसायिक कस्मेटिक सर्जनहरूको म्यापिङपछि वर्षेनी विश्वकै सुन्दर महिलाको सूची सार्वजनिक गरिन्छ। जसका लागि परम्परागत ग्रीक अंक गणितीय पद्धति गोल्डेन रेसियोको मद्दत लिइन्छ। सोहीअनुसार जोडीले सर्वाधिक ९४.५२ प्रतिशत अंक प्राप्त गर्दै सूचीको शीर्ष स्थान हासिल गरेकी हुन्।
किलिंग इभ, द बाइक राइडर्सजस्ता फिल्मको भूमिकाका लागि चर्चित ३० वर्षीया ब्रिटिश अभिनेत्री जोडीले यो परीक्षणमा नाक र ओठको स्थितिका लागि ९८.७ प्रतिशत स्कोर प्राप्त गरेको परीक्षणमा सहभागी चिकित्सक जुलियन डे सिल्भाले बताएकी छन्। यस सूचीको दोस्रो स्थानमा अभिनेत्री जेन्डाया रहेकी छन्।
तेस्रो स्थानमा सुपरमोडल बेला हदिद, चौथोमा पप स्टार बियोन्से, पाँचौंमा एरियाना ग्रान्डे, छैटौंमा टेलर स्वीफ्ट, सातौंमा जोर्डन डन, आठौंमा किम कार्डसियन तथा नवौं स्थानमा बलिउड अभिनेत्री दीपिका पादुकोण र दशौंमा होयोन जंग छन्।
