काठमाडौँ – इजरायलले लेबनानमा आफ्नो आक्रमण तीव्र बनाएपछि अष्ट्रेलियाले सोमबारसम्म ९०० भन्दा बढी आफ्ना नागरिकको उद्धार गरेको छ। अष्ट्रेलियाली सरकारले समन्वय गरेका प्रस्थान उडानहरूबाट ९०४ भन्दा बढी अष्ट्रेलियालीले लेबनान छोडेका छन्। उद्धार गरिएका व्यक्तिहरूमा अष्ट्रेलियाली नागरिक, लेबनानमा बसोबास गरिरहेका अष्ट्रेलियाली बासिन्दा र उनीहरूका परिवारका सदस्यहरू समावेश छन्।

अष्ट्रेलिया सरकारले शनिबार क्वान्टास र कतार एयरवेजद्वारा दुईवटा चार्टर उडानमार्फत बेरुतबाट साइप्रसका लागि उद्धार उडानहरू सञ्चालन गरेको थियो। यी उडानहरू साइप्रसबाट सिड्नीका लागि सञ्चालन भएका थिए। क्वान्टासको पहिलो उडान आइतबार राति ३४९ अष्ट्रेलियाली यात्रु लिएर स्वदेश फर्किएको थियो।

अष्ट्रेलियाली प्रशासनले जनाएको छ कि अझै पनि लेबनानमा ३,७५० भन्दा बढी अष्ट्रेलियाली दर्ता भएका छन् जसले देश छोड्न चाहिरहेका छन्। अष्ट्रेलिया सरकारले बेरुत विमानस्थल बन्द हुन सक्ने चेतावनी दिँदै लेबनानमा रहेका अष्ट्रेलियालीहरूलाई देश छोड्न महिनौँदेखि आग्रह गर्दै आएको छ। तथ्याङ्कअनुसार, बुधवारसम्म लेबनानमा करिब १५ हजार अष्ट्रेलियालीहरू रहेका थिए।

 

 

The post लेबनानबाट नौ सयभन्दा बढी अष्ट्रेलियाली नागरिकको उद्धार appeared first on Samudrapari.

Source : https://samudrapari.com/2024/10/492307/