‘मधेश प्रदेश सरकार परिवर्तनको हल्लामा सत्यता छैन’
मुख्यमन्त्री सतीशकुमार सिंहले सरकार परिवर्तनको हल्लामा कुनै सत्यता नरहेको दाबी गरेका छन् ।
गृहनगर राजविराजमा शुक्रबार आयोजित पत्रकार सम्मेलनमा बोल्दै मुख्यमन्त्री सिंहले सत्तागठबन्धन दलहरुसंग आपसी विश्वास र समन्वय भइरहेकाले हल्लाको पछि नलाग्न आग्रह गरे । विभिन्न दलको सहभागितामा बनेको वर्तमान सरकारमा आपसी विश्वास र समन्वय रहेको दाबीका साथ उनले सरकारमा जानका लागि कुनै दलले प्रयास गर्दैमा सरकार नढल्ने उनको दाबी छ ।
सात वर्षसम्म सरकारको नेतृत्व गरेको जसपा नेपालतर्फ लक्षित गर्दै उनले फेरी पनि सत्तामा जान चाहनु आश्चर्य नरहेको भन्दै बलियो बहुमतका साथ रहेको आफ् नो नेतृत्वको सरकारलाई केही फरक नपर्ने जिकिर गरे । जनताका समस्यालाई मध्यनजर गर्दै काम गर्नका लागि आफू नेतृत्वको सरकार लागि परेको दाबीका साथ उनले विभिन्न दलको सहभागिता रहेका कारण मिलाएर लैजाने क्रममा चाहेको अनुरुप काम गर्न नसकेको समेत बताए । “तथापि, हामीहरु काम गर्नका लागि प्रतिबद्ध छौँ उनले भने, सबैको एकैनासको कार्य क्षमता नहुन सक्छ ।” विगतका सरकारको पालामा प्रक्रिया नपु¥याई गरिएको नियुक्तिका कारण पनि काम गर्न अफ्ठ्यारो भइरहेको भन्दै मुख्यमन्त्री सिंहले विगतका कमिकमजोरी सुधारका लागि आफू छानबिनमा समेत लागेको जानकारी दिए ।
मधेश प्रदेश कृषि विश्वविद्यालयमा १० लाख मात्र न्युन बजेट छुट्याइएको विषयमा राखिएको जिज्ञासामा उनले कर्मचारीले गरेको त्रृटीका कारण यस्तो हुन गएको स्पष्ट पारे । विश्वविद्यालको खातामा अहिले पनि २५/३० करोड रुपैयाँ रहेका कारण काममा कुनै बाधा नपर्ने उनको कथन थियो । विगतमा प्रक्रिया मिचेर विश्वविद्यालयको रजिष्टार नियुक्ति गरिएको भन्दै उनले त्यहा काममा भन्दा पनि कमिशनको खेल बढी हुने गरेको दोषारोपन समेत गरे ।
प्रदेशमा रोजगारी सृजनाका लागि आफूहरुको ध्यान केन्द्रित रहेको बताउँदै उनले महिलालाई समेटेर कृषि क्षेत्रको आधुनिकीकरण र रोजगारी उपलब्ध गराउने योजना रहेको जानकारी समेत दिए । मधेश प्रदेशमा रहेको साक्षरताको न्यून अवस्थालाई उकास्न शिक्षा नीति तयारी गर्ने र सोही अनुसार अघि बढ्ने योजना समेत मुख्यमन्त्री सिंहले सुनाएका छन् । नेपाल पत्रकार महासंघ सप्तरीका सभापति श्रवण कुमार देवको अध्यक्षतामा पत्रकार सम्मेलनको भएको थियो ।
The post ‘मधेश प्रदेश सरकार परिवर्तनको हल्लामा सत्यता छैन’ appeared first on Janakpur Today.
