पलको ‘मायाबी’को प्रदर्शन मिति किन बारम्बार सर्दैछ ?
नायक पल शाहको करिअरमा एउटा हिट फिल्मको आवश्यकता छ । पल शाहले अभिनय गरेको फिल्म ‘रावायण’ असफल हुँदा उनको करिअरलाई ठूलो घाटा लाग्यो । यसैले, पल पनि सफल फिल्मको खोजीमा छन् । उनको करिअरलाई पार लगाउने आशा गरिएको फिल्म हो ‘मायाबी’ ।
दिवाकर भट्टराइको कथा, लेखन तथा निर्देशनमा तयार भएको फिल्म ‘मायाबी’ अब महाशिवरात्रीमा रिलिज हुने भएको छ । फागुनको १४ गतेबाट यो फिल्म रिलिजमा आउन लागेको हो ।
यसअघि पौष २६ गतेबाट रिलिजमा आउने भनिएको फिल्मलाई अब फागुनको १४ गतेबाट रिलिजमा ल्याउने तयारी निर्माणपक्षले गरेको हो ।
यसअघि यो मितिमा दिवाकरकै निर्देशनमा बनिरहेको फिल्म ‘नरसिंहाः अवतार’ रिलिज गर्ने बताइएको थियो । तर, अब ‘नरसिंहाः अवतार’ फागुनको १४ गते नआउने भनिएपछि ‘मायाबी’लाई रिलिजमा ल्याउन लागिएको हो ।
फिल्ममा नायक पल शाह, नायिका दीपिका प्रसाँइको मुख्य भूमिका छ । साथमा, प्रशान्त ताम्राकार, करिश्मा श्रेष्ठ, समीम खानको पनि फिल्ममा अभिनय छ । फिल्ममा दिवाकर भट्टराइको कथा तथा लेखन पनि छ । फिल्ममा ध्रुव न्यौपाने, राज कटुवाल र चन्द्र पन्तको निर्माताको रुपमा छन् । फिल्ममा मञ्जु भण्डारी, राजु पराजुली, सुमित ओली सह–निर्माता, प्रविण भट्टराई र करण सिंह कार्यकारी निर्माताको रुपमा छन् ।
