पोखरामा बस दुर्घटना : दुईजना घाइते
काठमाडौँ।
पोखरामा बस दुर्घटना भएको छ। दाङबाट भ्रमण टोली लिएर आएको बस बिहीबार दिउँसो साढे १२ बजेतिर पोखरा महानगरपालिका २२ शान्तिस्तुपानजिकै दुर्घटना भएकोहो।
नवयुग डान्स क्लब दाङको भ्रमणटोली बोकेको रा १ ख २१०६ नम्बरको मिनी बस पुम्दीकोटबाट छोरेपाटनतर्फ आउँदै गर्दा दुर्घटनामा परेको हो।
दुर्घटनामा दुई जना घाइते भएका छन्। घाइते हुनेहरूमा दाङको तुलसीपुर उपमहानगरपालिका ४ की १७ वर्षकी सन्ध्या रसाइली र १९ वर्षकी मनीषा रसाइली छन्। उनीहरूलाई उपचारका लागि नमस्ते अस्पताल बिरौटा पठाइएको प्रहरीले जनाएको छ।
वडा प्रहरी कार्यालय बैदाम कास्कीबाट खटिएको प्रहरीले घाइतेलाई उद्धार गरेको हो। बसमा २४ जना सवार थिए। चालकले नियन्त्रण गुमाउँदा सडकबाट खसेको बस तिदुको रुखमा अड्किएको छ।
उक्त बस क्रेनको सहायताले निकाल्ने पहल भइरहेको बताइएको छ।
