दक्षिण कोरियाको राजधानी सियोल यस वर्षको पहिलो हिमपातसँगै हिउँले छोपिएको छ। मौसम विभागका अनुसार यो सन् १९०७ देखि सुरु भएको रेकर्डयताकै सबैभन्दा धेरै नोभेम्बरमा भएको हिमपात हो ।

कोरिया मौसम विज्ञान प्रशासनका अनुसार बुधबार बिहान ७ बजेसम्म सियोलमा १६ दशमलव ५ सेन्टिमिटर हिउँ परेको थियो । योसँगै सन् १९७२ को २८ नोभेम्बरमा परेको १२ दशमलव ४ सेन्टिमिटर हिउँ परेको रेकर्डलाई तोडेर नयाँ कीर्तिमान बनेको छ।

सियोलको प्रसिद्ध ग्याङबोकगुङ दरबार हिउँले सेताम्मे भएको छ। दरबारमा हिउँ परेको दृश्य हेर्न आएका माकाओका पर्यटकहरू कोरियन परम्परागत हानबोक पोशाक लगाएर तस्बिर खिचिरहेका थिए।

यस भारी हिमपातले देशभर व्यापक अवरोध पुर्‍याएको छ। स्थानीय सञ्चारमाध्यमहरूले विमानस्थलका उडानहरू स्थगित गरिएको, सडकहरू बन्द गरिएको, र यातायात सेवामा ढिलाइ भएको रिपोर्ट गरेका छन्। सियोल नजिकै हिउँका कारण भएको सवारी दुर्घटनामा कम्तीमा एकजनाको ज्यान गएको बताइएको छ।

यस भारी हिमपातका कारण देशभरका विमानस्थलमा कम्तीमा २२० उडानहरू स्थगित गरिएका छन् भने करिब ९० वटा फेरीहरूलाई बन्दरगाहमा रोक्न निर्देशन दिइएको छ। साथै, सयौं पदमार्गहरू बन्द गरिएको छ।

सियोलका चिसो र चिप्ला सडकहरूका कारण बिहानको यात्रा प्रभावित भएको थियो। देशभर आपतकालीन कामदारहरूले ढलेका रुखहरू, साइनबोर्डहरू, र अन्य सुरक्षा जोखिमहरूलाई हटाउने काम गरेका छन्।

सियोलको मौसम पूर्वानुमान विभागले हिमपातको कारण पाश्चात्य हावाको उच्च दबाब र समुद्री सतह र चिसो हावाबीचको ठूलो तापक्रमको फरक रहेको बताएको छ । हिमपात बिहीबार बिहानसम्म जारी रहने अपेक्षा गरिएको छ।

Source : https://www.khasokhas.com/211891