काठमाडौं । सुनको भाउमा कीर्तिमानी घटोत्तरीपछि न्युरोडमा सुन किन्नेहरुको थामिनसक्नुको भीड देखिएको छ । साताको कारोबारको चौथो दिन सुनको भाउ केही बढेपनि दुई दिनको किर्तिमानी घटोत्तरीसँगै काठमाडौंमा विभिन्न सुन पसलहरुमा सुन अभाव भएपछि न्युरोडका पसलहरूमा सुन किन्नेहरू झुमिएका हुन् ।

नियमित रुपमा आफूले सुन किनिरहेका पसलहरुमा सुन नै छैन भन्दै व्यवसायीहरूले फर्काएपछि न्युरोडमा सुन किन्नेहरुको भीड थप बढेको हो । न्युरोडका श्री रिद्धिसिद्धी ज्वेलर्स, सगुन ज्वेलर्स, श्री ॐ ज्वेलर्स लगायतका सुन पसलहरूमा सुन किन्नेहरुको अचाक्ली भीड देखिएको छ ।

भीड बढेपछि केही सुन पसलहरूले आकस्मिक रुपमा कर्मचारीसमेत थप गरेका छन् ।

सरकारले सुनको भन्सार दर घटाएपछि सुनको भाउ ह्वात्तै घटेको थियो । त्यसको दोश्रो दिन पनि सुनको भाउ २६०० ले घटेको थियो भने आज साताको कारोबारको चौथो दिन सुनको भाउ ९ सयले बढेको छ ।

भाउ घटेपछि सुन बेच्नेहरू पनि नगन्य देखिएका छन् ।

Source : https://arthasarokar.com/2024/11/the-new-road-gold-shops-are-crowded.html