खोटाङ । दिक्तेल रुपाकोट मझुवागढी नगरपालिका–१५ विजयखर्कस्थित बसेरीमा निर्माण गरिएको ‘रामनाथ बहुउद्देश्यीय एकीकृत बस्ती’ अलपत्र अवस्थामा छ । दुई करोडभन्दा बढी लगानीमा निर्माण गरिएको यस बस्तीका १९ वटा ट्रस भवनमध्ये दुईवटामा मात्र मानिसहरू बसोबास गरिरहेका छन् ।

गत २०७७ मा उद्घाटन गर्ने लक्ष्यका साथ निर्माण शुरु गरिएको यस बस्तीमा २० घर भूकम्पपीडित र ४ घर अन्य गरी २४ परिवारका लागि आवास निर्माण गरिएको थियो । राष्ट्रिय पुनर्निर्माण प्राधिकरणको ६० लाख, कोशी प्रदेश सरकारको १५ लाख र भूकम्पपीडितको ६० लाख रुपैयाँ लगानी रहेको यो आयोजनाका लागि स्थानीय शारदाप्रसाद ढकालले साढे सात रोपनी जग्गा निःशुल्क प्रदान गरेका थिए ।

निर्माण उपभोक्ता समितिका संयोजक प्रमेश ढकालका अनुसार बजेट अभावका कारण रङ्गरोगन र झ्यालढोका जडान हुन नसक्दा बस्ती सञ्चालनमा आउन सकेको छैन । उनले नगरपालिकाले थप सात लाख रुपैयाँ उपलब्ध गराएको भए बस्ती सञ्चालनमा आउन सक्ने बताए । तर स्थानीय नेता सन्तोष राईले यस बस्ती मापदण्ड विपरीत रहेको र एकीकृत बस्तीको नाममा राज्यकोष र भूकम्पपीडितको रकम दुरुपयोग भएको आरोप लगाएका छन् । उनले यस विषयमा छानबिन गरी कारबाही गर्न माग गरेका छन् ।

बाल उद्यान, अङ्ग्रेजी माध्यमको विद्यालय, मन्दिर र खेलमैदान निर्माण गरिने भनिए पनि हाल १९ वटा ट्रस भवन र एउटा सामुदायिक भवन मात्र निर्माण भएका छन् । शौचालय र खानेपानीको समेत व्यवस्था नभएको यस बस्तीमा सर्न सहमति जनाएका भूकम्पपीडितहरू अझै आफ्नै पुराना घरहरु मर्मत गरि बसिरहेका छन् ।

भवनहरू व्यक्तिगत स्वामित्वमा हस्तान्तरण भए पनि अपर्याप्त भौतिक पूर्वाधार र सेवा सुविधाका कारण स्थानीयहरू त्यहाँ बस्न इच्छुक देखिएका छैनन् ।

The post एकीकृत बस्तीका अलपत्र भवन व्यक्तिगत स्वामित्वमा हस्तान्तरण हुँदै appeared first on राजधानी राष्ट्रिय दैनिक (लोकप्रिय राष्ट्रिय दैनिक)-RajdhaniDaily.com - Online Nepali News Portal-Latest Nepali Online News portal of Nepali Polities, economics, news, top stories, national, international, politics, sports, business, finance, entertainment, photo-gallery, audio, video and more....

Source : https://rajdhanidaily.com/id/102829/