भारतीय अभिनेता नितिन चौहानको निधन
नयाँ दिल्ली– भारतीय टेलिभिजनका चर्चित अभिनेता नितिन चौहानको निधन भएको छ । ३५ वर्षीय चौहानको मृत्युको कारणबारे आधिकारीक जानकारी मिलेको छैन । तर उनका सहकलाकारले आत्महत्या गरेको बताएका छन् ।
नितिन चौहान अलीगढका बासिन्दा थिए । उनी आफ्नो अभिनयको करिअरलाई निरन्तरता दिन मुम्बईमा बस्दै आएका थिए ।
उनी रियालिटी सो दादागिरी २ को विजेता बनेर चर्चामा आएका थिए । उनले दूरदर्शनको टिभी कार्यक्रम जिन्दगी डट कममा आफ्नो अभिनयको सुरुवात गरेका थिए । यस पछि, उनी सन् २०१२ मा एमटीभी स्प्लिट्सभिला सिजन ५ मा सहभागी बने । उक्त शोमा अभिनेता अली गोनीलाई हराउँदै नितिन उपविजेता भए बने भने पारस छाबडा विजयी भए ।
यो शोबाट नितिन चौहानले निकै लोकप्रियता कमाएका थिए। यसपछि उनी क्राइम पेट्रोल, गुमराह, फ्रेन्ड्स कन्डिसन अप्लाइ, सावधान इन्डिया जस्ता टिभी शोमा पनि देखिए । उनी पछिल्लो पटक टिभी सो तेरा यार हुँ मैंमा देखिएका थिए ।
