अमेरिकी राष्ट्रपति निर्वाचनमा पराजयपछि उपराष्ट्रपति कमला ह्यारिसले पराजय स्वीकार गर्दै राष्ट्रपतिमा निर्वाचित डोनाल्ड ट्रम्पलाई बधाई दिएकी छिन् । बुधबार भएको फोन कलमा ह्यारिसले ट्रम्पलाई अमेरिकाको नयाँ राष्ट्रपति निर्वाचित भएकोमा बधाई दिएकी हुन् ।

ह्यारिसले ट्रम्पसँग शान्तिपूर्ण सत्ता हस्तान्तरणको महत्त्व र सम्पूर्ण अमेरिकीहरूको राष्ट्रपति बन्ने जिम्मेवारीबारे कुराकानी गरेकी थिइन्। यो कुराकानी केवल केही मिनेट मात्र चलेको थियो । ह्यारिसले हावर्ड विश्वविद्यालयमा स्थानीय समय अनुसार दिउँसो ४ बजे सम्बोधन गर्ने कार्यक्रम छ।

ब्याटलग्राउण्ड राज्यहरु नर्थ क्यारोलिना, पेन्सिल्भेनिया, मिसिगन, विसकन्सिन र जर्जियामा जितेपछि ट्रम्प अमेरिकाको ४७ औं राष्ट्रपति हुने निश्चित भएको हो । त्यस्तै नेभाडा र एरिजोनामा पनि ट्रम्पको अग्रता रहेको छ । अहिलेकै ट्रेण्ड कायम रहेमा ट्रम्पले ३१२ इलेक्टोरल मत प्राप्त गर्नेछन् । अमेरिकी राष्ट्रपतिमा निर्वाचित हुनका लागि २७० इलेक्टोरल मतको आवश्यकता पर्छ ।

आफ्नो जीवनमा दुई प्रयासहरूले भरिएको ऐतिहासिक चुनाव चक्र पछि यो निर्वाचनले ट्रम्पलाई व्हाइट हाउसमा दोस्रो कार्यकाल प्रदान गर्नेछ । २०१६ मा राष्ट्रपति पदमा बिजयी भएका ट्रम्प २०२० मा जो बाइडेनसँग पराजित भएका थिए । डेमोक्र्याटिक प्राइमरीमा विजयी बाइडेनले उम्मेदबारी त्यागेपछि १०० दिनअघि चुनावी दौडमा प्रवेश गरेकी कमला ह्यारिसलाई ट्रम्पले पराजित गरेका हुन् ।

ट्रम्प लगातार निर्वाचित नभई दुई कार्यकाल अमेरिकी राष्ट्रपति हुने अमेरिकी इतिहासमा दोश्रो व्यक्ति हुनेछन् । सन् १८८४ र १८९२ मा निर्वाचित ग्रोभर क्लिभल्याण्डले पनि लगातार चुनाव नजितिकनै दुई कार्यकाल अमेरिकी राष्ट्रपति भएका थिए ।

अमेरिकी चुनावमा मतदान गर्न योग्य अमेरिकीहरुले इलेक्टोरल मतका लागि इलेक्टरहरु छान्नका लागि अमेरिकी इलेक्टोरल कलेजका सदस्यहरुका लागि मतदान गर्दछन् । त्यस्ता इलेक्टरहरुले पहिले नै आफूले कुन उम्मेदवारका लागि मतदान गर्ने भन्ने सार्वजनिक गरिसकेका हुन्छन् । जनताबाट छानिएका इलेक्टरहरुले राष्ट्रपति र उपराष्ट्रपतिका लागि इलेक्टोरल मतदान गर्दछन् । मतदानपछि पूर्ण बहुमतप्राप्त उम्मेदवारलाई विजेता घोषणा गरिन्छ ।

५० वटा राज्य र वासिंटन डिसीबाट जनसंख्याको अनुपातको आधारमा ५३८ इलेक्टोरल मतको तय गरिएको छ । अमेरिकामा अधिकांश राज्यमा विगतको इतिहास र पार्टीको प्रभावको आधारमा चुनाव कस्ले जित्छ भन्ने लगभग सुनिश्चित जस्तै नै हुने गर्छ ।

 

Source : https://www.khasokhas.com/211346