चिनिया कम्पनी बाइटडान्सले टिकटक नबेचे अमेरिकामा टिकटकमा प्रतिबन्ध लगाउने बिलमा राष्ट्रपति जो बाइडेनले हस्ताक्षर गरेका छन् । यो कानून अन्तरगत अमेरिकामा टिकटक चलाउनका लागि अब २७० दिन अर्थात् झण्डै ९ महिनाभित्र बाइटडान्सले टिकटक बेच्नुपर्नेछ । अन्यथा अमेरिकामा टिकटकमा प्रतिबन्ध लाग्नेछ । राष्ट्रपतिले यो समयसिमा एक वर्षसम्म बढाउन सक्नेछन् ।

प्रतिनिधिसभाबाट ३६० मतका साथ पारित भएको यो बिल सिनेटबाट मंगलबार राती ७९ मतका साथ पारित भएपछि बुधबार राष्ट्रपति बाइडेनले हस्ताक्षर गरेका हुन् ।

टिकटक अमेरिकामा जानकारी को एक प्रमुख स्रोत भएको छ। ३० वर्ष मुनिका एक तिहाइ अमेरिकीहरूले नियमित रूपमा टिकटकबाट समाचार प्राप्त गर्छन्। टिकटक अमेरिकाको अग्रणी वैश्विक प्रतिद्वन्द्वी कम्पनीको स्वामित्वमा छ।

चीनले टिकटकलाइै हौवा फैलाउने उपकरणको रुपमा प्रयोग गरेको प्रमाणहरु पनि छन् ।  दुई अनुसन्धान समूहहरूको भर्खरको रिपोर्ट अनुसार हङकङको विरोध र तिब्बत जस्ता चिनियाँ सरकारले दबाउन चाहेका विषयहरूसँग सम्बन्धित पोस्टहरू प्लेटफर्मबाट अनौठो रूपमा हराइरहेका हुन्छन् । चीनका  सहयोगी देशहरू रूस र इरानका लागि संवेदनशील विषयहरूमा पनि टिकटकमा दबाउने गरिएको छ ।

टिकटकमा प्रतिबन्ध लाग्नसक्ने बिलमा बाइडेनले हस्ताक्षर गरिसकेतापनि टिकटकका लागी  भने लडाई समाप्त भएको छैन । चिनियाँ अधिकारीहरूले बाइटडान्सलाई टिकटक बेच्न अनुमति नदिने संकेत दिइसकेका छन् । बाइटडान्सले अदालतमा  लड्ने योजना बनाएको छ। यसमा केही अमेरिकी सहयोगीहरू पनि हुनेछन्। उनीहरुले  टिकटक सम्बन्धि बिलले संविधानको पहिलो संशोधनको उल्लङ्घन गरेको बताएका छन् ।

त्यस्तै  टिकटकका लगानीकर्ता र चुनावमा रिपब्लिकनका प्रमुख  दाता जेफ यासले बिल विरुद्धको लडाईको नेतृत्व गरिरहेका छन्। उनी टिकटकको पक्षमा वकालत गर्ने काटो इन्स्टिच्युटका पूर्व बोर्ड सदस्य पनि हुन् ।  यासले नै डोनाल्ड ट्रम्पलाई टिकटकबारेको अडान उल्टाउन र बिलको विरोध गर्न मनाएको हुनसक्ने बताइन्छ ।

Source : https://www.khasokhas.com/203305