पोखरा । नेपाली फिल्मको ६० वर्षे इतिहासमा सर्वाधिक कमाई गरेको ब्लकबस्टर फिल्म ‘पूर्णबहादुरको सारङ्गी’ का मुख्य कलाकार विजय बराल शनिबार पोखरेली दर्शकमाझ घेरिए ।

पोखरा सभागृह चोकस्थित मिड टाउन ग्यालेरियामा दर्शकप्रति आभार व्यक्त गर्न उनी के छिरेका थिए, दर्शकले उनीप्रति प्रेमभाव दर्शाउँदै लगातार सेल्फी खिचिरहे । कलाकार बरालले पनि फिल्म मन पराइदिएकोमा खुसी व्यक्त गर्दै दर्शकलाई धन्यवाद दिए ।

फिल्म यूनिटसहित साँझ पौने ६ बजे मिट टाउनमा उनले फिल्म हेरेर बाहिरिन लागेका दर्शकको प्रतिक्रिया लिए भने लगत्तै अर्को शो छिर्न लागेका दर्शक भेटे । यस्तै, उनले शनिबार नै चिप्लेढुंगास्थित सिने प्लेक्सका दर्शकसँग पनि प्रत्यक्ष भलाकुसारी गरे ।

प्रदर्शनको ठिक ३ सातामा ४० करोड रुपैयाँभन्दा बढी कमाइ गरेको यस वर्षको सर्वाधिक सफल फिल्म ‘पूर्णबहादुरको सारङ्गी’ मा बराल लिड क्यारेक्टर हुन् । बाबुको भूमिकामा उनको अभिनयले दर्शक दिनहुँ हल तानिरहेको छ । नाटक अभिनयमा थियटरमा समेत जीवन्त लाग्ने बराल डेढ दशक लामो फिल्म करियरमा भने सधैँजसो हास्यपात्रमा देखा परे ।

लिड रोलमा उनको यो डेब्यू हो । तैपनि फिल्मभर छोरा ठूलो बनाउन उनको गरेको संघर्षको सेन्टिमेन्टले दर्शकलाई आँशु पुछ्दै बाहिरिन बाध्य गराउँछ । लक्ष्मीपूजाको दिनदेखि प्रदर्शन आरम्भ यो फिल्मले अझै केही साता राम्रो ब्यापार गर्ने निश्चित छ । फिल्मले नेपालसहित विदेशमा पनि उस्तै शो पाइरहेको छ ।

संचारकर्मीसँग छोटो प्रतिक्रिया दिँदै उनले आफ्नो क्यारेक्टर मन पराइदिएकोमा खुसी व्यक्त गर्दै अबको केही समय नाटकमा ब्यस्त हुने जानकारी दिए । उनले समाजका विभिन्न चरित्रमध्ये फरक–फरक खालको चरित्रमा अभिनय गर्दै जाने बताए । दर्शकले यस्तैखालको चरित्र मन पराए पनि आगामी यहीखालको चरित्रमा देखा नपर्ने स्पष्ट पारे ।

The post कलाकार विजय बराल घेरिए दर्शकमाझ appeared first on राजधानी राष्ट्रिय दैनिक (लोकप्रिय राष्ट्रिय दैनिक)-RajdhaniDaily.com - Online Nepali News Portal-Latest Nepali Online News portal of Nepali Polities, economics, news, top stories, national, international, politics, sports, business, finance, entertainment, photo-gallery, audio, video and more....

Source : https://rajdhanidaily.com/id/104300/