बैंकहरुमा पैसा थुप्रियो, राष्ट्र बैंकले फेरी १ खर्ब तान्दै
काठमाडौँ । नेपाल राष्ट्र बैंकले बैंक तथा वित्तीय संस्थाबाट १ खर्ब रुपैयाँ तान्ने भएको छ । बैंकिङ प्रणालीमा अधिक तरलता थुप्रिएपछि राष्ट्र बैंकले निक्षेप संकलन उपकरणमार्फत १ खर्ब रुपैयाँ तान्न लागेको हो ।
राष्ट्र बैंकका अनुसार राष्ट्र बैंकमा निक्षेप राख्न चाहनेहरुले कात्तिक १ गते (बिहीबार) दिउँसो ३ बजेसम्म आवेदन दिन सक्नेछन् ।
आवेदन दिँदा बैंक तथा वित्तीय संस्थाहरुले न्यूनतम १० करोड रुपैयाँ राख्नेगरी आवेदन दिनुपर्ने राष्ट्र बैंकले जनाएको छ । राष्ट्र बैंकका अनुसार सबैभन्दा कम ब्याजदरमा बोलकबोल गर्ने बैंकको आवेदन पहिलो प्राथामिकतामा पर्नेछ ।
पछिल्लो समय बैंक तथा वित्तीय संस्थामा अधिक तरलता थुप्रिरहँदा तरलता व्यवस्थापनमा समस्या भएपछि राष्ट्र बैंकले बैंकिङ प्रणालीबाट तरलता तानिरहेको छ । तर पनि बैंकिङ प्रणालीमा कर्जाको माग भने बढेको छैन । हाल बैंकहरुमा अधिक तरलता थुप्रिएपछि अन्तरबैंक ब्याजदर करिडोरको तल्लो सीमाभन्दा पनि तल झरेको छ ।
