सडक आन्दोलनमा जान हच्कियो रास्वपा
काठमाडौं – राष्ट्रिय स्वतन्त्र पार्टी (रास्वपा) सडक आन्दोलनमा जान हच्किएको छ । रास्वपाले सभापति रवि लामिछानेमाथि सहकारी रकम अपचलनको आरोपमा पक्राउ परेपछि सुरु भएको सडक आन्दोलनको शैली परिवर्तन गर्ने भएको हो ।
मंगलबार र बुधबार बसेको केन्द्रीय समितिको बैठकले दोस्रो चरणको आन्दोलनको क्रममा सडक प्रदर्शनलाई प्राथमिकता नदिने निर्णय गरेको छ । रास्वपाले अब उपनिर्वाचन हुने क्षेत्रहरूमा केन्द्रीय नेताहरूलाई खटाउने र मंसिर ८ र ९ गते विभिन्न क्षेत्रहरूमा पार्टीको भेला आयोजना गर्ने योजना सार्वजनिक गरेको छ ।
रास्वपाका कार्यवाहक प्रवक्ता मनिष झाका अनुसार, पार्टीले उम्मेदवारी दिएका क्षेत्रहरूमा केन्द्रीय नेताहरूले भेला गराउने छन्। ‘हामी आफ्नो राजनीतिक दृष्टिकोण स्पष्ट पार्न र राजनीतिक प्रतिशोधका घटनाहरूको जानकारी गराउन भेला गराउँदैछौं,’ कार्यवाहक प्रवक्ता झाले भने ।
रास्वपाले दुई दिनका लागि तय गरेको विरोध कार्यक्रमलाई आन्दोलनको रूपमा नभई, कार्यकर्ता भेला गरेर आफ्ना मुद्दा जानकारी गराउने प्रकारको बनाएको छ । पार्टीभित्रैबाट सडक प्रदर्शनको प्रभावकारितामा प्रश्न उठेसँगै विरोधको तरिका फेरबदल गर्ने निर्णय भएको हो ।
२ मंसिरको पत्रकार सम्मेलनमा रास्वपाले काठमाडौंमा केन्द्रित विरोध प्रदर्शनको योजना बनाइएको थियो । तर, दुई दिनको केन्द्रीय समितिको बैठकपछि सार्वजनिक निर्णय अनुसार पार्टीले सडक प्रदर्शनको सट्टा, कार्यकर्ताहरूलाई जानकारी गराउने भेलामा ध्यान केन्द्रित गर्ने निर्णय गरेको छ ।
रास्वपाभित्र सडक प्रदर्शनको प्रभावकारिता र औचित्यबारे नेताहरुबीच छलफल भएपछि विरोधका लागि नयाँ शैली अपनाउने निर्णय गरेको छ । अब पार्टीले विरोधलाई जनतासम्म पुर्याउन र आफ्नो मुद्दाहरू प्रष्ट पार्न, सडक आन्दोलनभन्दा फरक शैलीमा प्रस्तुत हुने बताइएको छ ।
The post सडक आन्दोलनमा जान हच्कियो रास्वपा appeared first on Samudrapari.
