पुर्वक्लब सान्तोस फर्किदै नेइमार !
काठमाडौं ।
ब्राजिलका सुपरस्टार फुटबलर नेइमार आफ्नो पुर्व क्लब सान्तोस फर्किने भएका छन् ।
ब्राजिलका खेल पत्रकार सिएल मेर्लोले नेइमार र क्लब सान्तोससँग सहमति भइसकेको दाबि गर्दै अब अल हिलालसँग नेइमारको सम्झौता रद्ध गर्ने प्रक्रिया शुरु भएको दाबि गरेका छन् । मेर्लो ब्राजिलका फुटबलरको ट्रान्सफर सम्बन्धि रिपोर्ट गर्ने भरपर्दो पत्रकार मानिन्छन् ।
करिब एक बर्षको इन्जुरीपछि खेलमा फर्किएका नेइमार फेरी घाइते भएपछि अल हिलालले उनलाई किनारा गरेको थियो । अब अल हिलालले नेइमारसँगको सम्झौता जनवरीमा रद्ध गर्ने विभिन्न रिपोर्टमा दाबि गरिएको छ । अल हिलालका लागि कुल ७ खेल खेलेका नेइमारले साउदी लिगमा भने केवल ३ खेल खेलेका छन् ।
अल हिलालले २०२३ मा नेइमारलाई फ्रेन्च क्लब पिएसजीबाट ९० मिलियन युरो तिरेर भित्र्याएको थियो । अल हिलालले नेइमारलाई बार्षिक करिब सय मिलियन युरो पारिश्रमिक दिने गर्दछ । नेइमार खेल्न नसक्ने भएपछि अल हिलालले आफ्नो ठुलो आर्थिक दायित्वबाट बच्न सम्झौता रद्द गर्ने प्रक्रियामा अगाडी बढेको बताइएको छ ।
सान्तोसले नेइमारसँगको सम्झौता ब्राजिलको सिरी बी का खेल सकिएपछि घोषणा गर्ने दाबि गरिएको छ । सिरी बी मा शिर्ष स्थानमा रहेको सान्तोसले आफ्नो यस सिजनको अन्तिम खेल नोभेम्बर २५ मा खेल्दै छ । गत सिजनमा सिरी बी मा रेलिगेट भएको सान्तोस यस सिजनमा भने सिरी ए मा बढुवा हुने निश्चित रहेको छ ।
नेइमारले २००९ मा सान्तोसका लागि डेभ्यु गरेका थिए । २०१३ मा बार्सिलोना जानु अघि नेइमारले सान्तोसका लागि २२५ खेलमा १३६ गोल गरेका थिए । सो अवधिमा नेइमारले सान्तोसमा तीन सिजन सिरी ए को उपाधि जितेका थिए भने एक सिजन उपविजेता बनेका थिए । त्यस्तै एक सिजन कोपा ब्राजिल र २०११ मा कोपा लिबरटाडोरेज जितेका थिए ।
