जापानमा अब साइकल चालकले फोन चलाए वा मापसे गरेको भेटिए जेल सजाय हुने
टोकियो – जापानमा साइकल चालकमाथि थप निगरानी गरिने भएको छ । शुक्रबारदेखि लागू भएको एक संशोधित जापानी यातायात कानुनले साइकल चलाउँदा मोबाइल फोन प्रयोग गर्ने वा मादक पदार्थ सेवन गरेको पाइएमा चालकलाई जेल सजाय र जरिवानाको प्रावधान ल्याएको हो ।
संशोधित कानुनअनुसार मोबाइल फोन प्रयोग (कल गर्न, म्यासेज पठाउन वा हेर्न मात्र भए पनि) गरेका व्यक्तिहरूले ६ महिना सम्मको जेल सजाय वा १ लाख येन (लगभग ६५० अमेरिकी डलर) सम्मको जरिवाना तिर्नु पर्नेछ । यदि यसले दुर्घटना निम्त्याउँछ भने, सजाय १ वर्षको जेल र ३ लाख येन सम्मको जरिवानामा पुग्न सक्नेछ ।
यसअघि, साइकल चलाउँदा मोबाइल फोन प्रयोग गर्नेलाई स्थानीय सार्वजनिक सुरक्षा आयोगले ५० हजार येनसम्मको जरिवाना लगाउँथ्यो । संशोधित सडक यातायात ऐनले मादक पदार्थको प्रभावमा साइकल चलाउने व्यक्तिहरूको सजायलाई पनि कडा बनाएको छ । ०.१५ मिलिग्राम प्रतिलिटर श्वासमा मादक पदार्थ पाइएको साइकल चालकलाई ३ वर्षसम्मको जेल सजाय वा ५ लाख येनसम्मको जरिवाना लगाइनेछ ।
मादक पदार्थ सेवन गरी साइकल चलाउने गम्भीर अपराध पहिले नै कानुनमा समावेश थियो । यस्तो अपराध गर्ने व्यक्तिहरूले ५ वर्षसम्मको जेल सजाय वा १० लाख येन सम्मको जरिवाना तिर्नुपर्ने प्रावधान छ । कानुन लागू भएपछि, ओसाका प्रिफेक्चरल प्रहरीले शुक्रबार मादक पदार्थको प्रभावमा साइकल चलाएको आरोपमा एउटा रातो टिकट जारी गरिसकेको छ र अन्य ६ वटा घटनाको अनुसन्धान गरिरहेको छ ।
सन् २०१३ देखि २०१७ सम्ममा मोबाइल फोन प्रयोग गरेर साइकल चलाउँदा २९५ दुर्घटना भएका थिए, तर पछिल्लो पाँच वर्षमा यो संख्या ५० प्रतिशतले बढेर ४५४ पुगेको जापानी राष्ट्रिय प्रहरी एजेन्सीले जनाएको छ ।
The post जापानमा अब साइकल चालकले फोन चलाए वा मापसे गरेको भेटिए जेल सजाय हुने appeared first on Samudrapari.
