प्रदीपलाई बक्स अफिस हिटको आवश्यकता
उसो त यो बर्ष रिलिजमा आएको फिल्म ‘पुजार सार्की’ले बक्स अफिसमा राम्रो कमाई गर्यो । तर, यो फिल्मको क्रेडिट नायक प्रदीप खड्कालाई मात्र गएन । यसैले, प्रदीपका लागि माघको १६ गतेबाट रिलिजमा आउन लागेको फिल्म ‘एक्टर’ महत्वपूर्ण मानिएको छ ।
यो फिल्ममा प्रदीप सोलो नायक हुन् । फिल्म चलाउनुपर्ने दायित्व उनको काँधमा छ । यस्तो अवस्थामा ‘सुपरस्टार’को ट्याग लिएका प्रदीपको यो फिल्मको व्यापार सबैको लागि विशेष आकर्षणमा रहनेछ ।
नायक प्रदीप खड्का एकपछि अर्को फिल्ममा काम गरिरहेका छन् । उनले अभिनय गरेको फिल्म ‘पिताम्बर’को छायांकन जारी छ । यो फिल्ममा भने उनी एक्सन अवतारमा देखिदैछन् ।
नेपाली फिल्मको बक्स अफिस चुलिएको छ । फिल्मले ५० करोडको आँकडा छुने अवस्था सिर्जना भइसकेको छ । सामान्य फिल्म पनि १० करोड माथिको व्यापारमा नगएको खण्डमा दर्शकको आँखामा नपर्ने देखिन्छ । यस्तो अवस्थामा स्टारडम राम्रो रहेको भनिएका प्रदीपको ‘एक्टर’ले ह्यान्डसम आँकडा पार गर्न आवश्यक छ ।
