काठमाडौँ । कास्की प्रहरीको हिरासतमा रहेका पूर्व गृहमन्त्री एवम् राष्ट्रिय स्वतन्त्र पार्टी (रास्वपा)का सभापति रवि लामिछानेलाई बयानका लागि आज काठमाडौँ ल्याइँदै छ । सहकारी ठगी प्रकरणमा हिरासतमा रहेका उनलाई मङ्गलबार बिहान बुद्ध एयरको जहाजबाट काठमाडौँ ल्याउन लागिएको हो । 

काठमाडौँको कालीमाटीस्थित स्वर्णलक्ष्मी सहकारीको बचत हिनामिना प्रकरणमा अनुसन्धानका लागि उनको बयान लिइने छ ।

कास्की जिल्ला अदालतले गत आइतबार थप १५ दिन हिरासतमा राखेर अनुसन्धान गर्न अनुमति दिएपछि उनलाई काठमाडौँ ल्याउन लागिएको हो । उनको बयान लिएर फेरि पोखरामै फर्काइने छ । 

गत कात्तिक २ गते नेपाल प्रहरीको केन्द्रीय अनुसन्धान ब्युरो (सीआईबी)को टोलीले लामिछानेलाई काठमाडौँको बनस्थलीस्थित रास्वपाको केन्द्रीय कार्यालयबाट पक्राउ गरेको थियो । रवि विरुद्ध जिल्ला अदालत रूपन्देही र काठमाडौँ जिल्ला अदालतले पनि पक्राउ पुर्जी जारी गरेको छ भने चितवनमा उनीविरुद्ध सहकारीका बचतकर्ताले जाहेरी दिएका छन् । 

Source : https://arthasarokar.com/2024/11/ravi-is-being-brought-to-kathmandu-today-for-a-statement.html