दुर्गा प्रसाई क्यान्सर अस्पताल भर्ना
समाचार सुन्नुहोस :
काठमाडौँ – साइबर अपराधको आरोपमा पक्राउ परेका मेडिकल व्यवसायी दुर्गा प्रसाईंलाई उपचारका लागि ललितपुरको हरिसिद्धीस्थित नेपाल क्यान्सर अस्पतालमा भर्ना गरिएको छ। साइबर ब्यूरोका अनुसार बिहीबार चेकजाँचका लागि उनलाई अस्पताल लगिएको थियो। त्यहाँ चिकित्सकले अस्पताल भर्नै गर्नुपर्ने बताएपछि बिहीबार साँझ बेड भर्ना गरिएको साइबर ब्यूरोका प्रमुख डीआईजी नविन्द अर्यालले जानकारी दिए ।
यसअघि पनि प्रहरीले वीर अस्पतालमा प्रसाईंको स्वास्थ्य परीक्षण लागेको थियो। तर, चिकित्सकहरूले अस्पतालमा भर्ना हुनु आवश्यक नरहेको बताएपछि उनलाई पुनः हिरासतमा फर्काइएको थियो। प्रसाईंले आफू क्यान्सरको बिरामी भएको र अस्पतालमै बस्नुपर्ने दाबी गर्दै आएका थिए। यस विषयमा जिल्ला अदालत काठमाडौँले म्याद थप गर्दा प्रहरीलाई उनको स्वास्थ्यप्रति ख्याल गर्न निर्देशन दिएको थियो। बुधबार सर्वोच्च अदालतले बन्दी प्रत्येक्षीकरणको निवेदनमा सुनुवाइ गर्दै उनलाई आवश्यक उपचारको राम्रो व्यवस्था गर्न आदेश दिएपछि बिहीबार क्यान्सर अस्पतालमा भर्ना गरिएको हो।
प्रसाईंलाई प्रधानमन्त्री केपी ओलीको नाम जोडेर कम्बोडियामा लगानी भएको दाबीसहित अभिव्यक्ति दिएपछि पक्राउ गरिएको हो। उनीमाथि विद्युतीय अपराधसम्बन्धी अनुसन्धान जारी रहेको छ।
The post दुर्गा प्रसाई क्यान्सर अस्पताल भर्ना appeared first on Samudrapari.
