भारतले नेपालमा नाकाबन्दी गरेको थिएन, सिमानामा अवरोध थियो : डा. विजय जोली
भारतीय जनता पार्टीका नेता डा. विजय जोलीले वि.सं. २०७२ सालमा नेपालमा नाकाबन्दी नगरेको दाबी गरेका छन् ।
बिहीबार काठमाडौंमा आयोजित साक्षात्कारमा उनले २०७२ मा लगाइएको ६ महिने नाकाबन्दीबारे यस्तो टिप्पणी गरेका हुन् ।
नेपालमाथि भारतले नाकाबन्दी गरेको आरोप लगाए पनि त्यसमा सत्यता नभएको जिकिर उनले गरे । ‘हामीमाथि नेपालमा नाकाबन्दी लगाएको आरोप थियो । जुन सरासर राजनीतिबाट प्रेरिरत थियो’, उनले भने ।
नेपालका राजनीतिक दलको आन्दोलन र सीमामा अवरोधका कारण त्यस्तो अवस्था सिर्जना भएको जिकिर उनले गरेका छन् ।
‘नेपाल सधैँ विकसित होस भन्ने भारतले चाहना राखेको छ । हामीले त सपनामा पनि सोचेका थिएनौँ, नेपालमा खाद्य अवरोध होस भनेर, त्यतिबेला सीमामा भएको आन्दोलनको कारण रोकिएको थियो । भारतले सधैँ ठूलो हृदय देखाउनुपर्छ, यो समयको आवश्यककता हो’, उनले भने ।
नेपालका सडकमा भारतीय प्रधानमन्त्रीको पुत्ला दहन हुने विषय आफूहरूलाई सह्य नहुने उनले बताए ।
‘मेरो प्रधानमन्त्रीको पुत्ला काठमाडौंको सडकमा जलाइयो, अन्याय भयो भने हाम्रो पनि हृदयभित्र दर्द महशुस हुनु र हामीले त्यस्तो महशुस गर्नु स्वभाविक हो’, उनले भने, ‘आजको आवश्यककता नै सम्वाद हो । भारत यसमा कटिबद्ध छ । नेपाल पनि प्रतिबद्धत छ । सचेत छ । यो विषयमा न्याय गर्छ भन्ने मेरो विश्वास छ ।’
नेपाल र नेपाली मोटाप्रति आफ्नो उच्च सम्मान र लगाव रहेको पनि जोलीले सुनाए । ‘मलाई नेपाल आउने धेरै वर्षदेखि शौभाग्य मिलेको छ । नेपालमा लोकतन्त्रको बहालीको लागि र पिपुल टु पिपुल मित्रतालाई बढावा दिनको लागि नेपाल आउने सौभाग्य मिलेको छ’, उनले भने, ‘म जहिले नेपाल आउँछु, हवाईजहाजबाट उत्रिनेबित्तिकै नेपाली माटोमा हात लगाउँछु । त्यो माटो निधारमा लगाउँछु । नेपालको पुण्य भूमिलाई नमस्कार गर्छु । विजय जोली सायद अघिल्लो जन्ममा नेपालमा पैदा भएको थियो । त्यही भएर यत्रो प्रेम र लगाव नेपालको साथ छ ।’
उनले आफू भारतीय जनता पार्टीको विदेश विभाग प्रमुख भइसकेको नाताले पनि विगत लामो समयदेखि नेपाल आवातजावत गर्ने गरेको स्मरण गराए ।
‘सन् २०१५ मा जब नेपालमा भूकम्प आएको थियो, पहिलो सहयोग हाम्रा प्रधानमन्त्री नरेन्द्र मोदीले नै घोषणा गर्नुभएको थियो । नेपालको लागि उद्धार, राहत र पूननिर्माणको लागि पहल गर्नुभयो । त्यहीअनुसार भारतबाट यहाँ राहत सामाग्री आए । औषधी, खाद्य सामाग्री, टेण्ट ल्याउनुभयो । त्यतिबेला एक हजार ५७७ हवाई उडान भरेर भारतबाट नेपालमा जहाज उत्रिएका थिए’, उनले भने, ‘मलाई याद छ कोभिड–१९ को समयमा पनि भारतले ठूलो सहायता गरेको छ । सन् २०२० मा ३३ हजार पिसिआर किट्स प्रदान सहायता भयो । सन् २०२१ मा कोभिशिल्ड खोप दश लाख नेपाललाई प्रदान गरिएको थियो ।’
उनले ५० लाख नेपाली जनता अहिले भारतमा रोजगारीका क्रममा रहेको तथ्यांक पेश गरे । उनीहरुको योगदानको कारण भारत अहिले सशक्त र बलियो बनेको जोलीले बताए ।
‘भारत र नेपालबीच सैनिक क्षेत्रमा पनि राम्रो साझेदारी छ । भारतका आर्मी चिफ पनि अहिले नेपाल भ्रमणमा हुनुहुन्छ । राष्ट्रपतिबाट सर्वोत्तम उपाधिबाट सम्मान हुँदैछ । दुवै देशले सूर्यकिरण संयुक्त सैन्य अभ्यास गरिहेका छन्’, उनले भने ।
The post भारतले नेपालमा नाकाबन्दी गरेको थिएन, सिमानामा अवरोध थियो : डा. विजय जोली appeared first on Janakpur Today.
