रवि लामिछानेलाई थप १५ दिन हिरासतमा राख्न अदालतको अनुमति, थप अनुसन्धानका लागि काठमाडौं ल्याइने
काठमाडौं– सहकारी ठगी प्रकरणमा रवि लामिछानेलाई थप १५ दिन हिरासतमा राख्न अदालतको अनुमति प्राप्त भएको छ । पछिल्लो समय १३ दिनको लागि हिरासतमा राख्न थप गरिएको म्याद सक्किएपछि लामिछानेलाई आज प्रहरीले कास्की जिल्ला अदालतमा उपस्थित गराइएको थियो ।
न्यायाधीश हिमलाल बेलवासेको इजलाशले उनलाई थप १५ दिन हिरासतमा राख्न अनुमति दिएको हो । आज थपिएको म्याद पाँचौ पटकको हो ।
पोखराको सूर्यदर्शन सहकारीको रकम अपचलन आरोपमा अनुसन्धान गर्न लामिछानेलाई गत कात्तिक २ गते काठमाडौंबाट प्रहरीले पक्राउ गरेको थियो । पक्राउलगत्तै कास्की लगिएका लामिछानेलाई जिल्ला प्रहरी कार्यालयमा हिरासतमा राखेर अनुसन्धान गरिएको छ । उनीविरुद्ध सहकारीको रकम अपचलन, सङ्गठित अपराध र सम्पत्ति सुद्धीकरण मुद्दामा प्रहरीले अनुसन्धान गरिएको छ ।
कास्की प्रहरीको हिरासतमा लामिछाने रहिरहँदा उनीविरुद्ध रूपन्देही, काठमाडौं र चितवनमा पनि सहकारी रकम अपचलनको आरोपमा उनीविरुद्ध पक्राउ पुर्जी जारी भएको छ ।
यसअघि उनलाई रुपन्देहीको बुटवलस्थित सुप्रिम सहकारीको बचत हिनामिनाको आरोपमा पोखराबाट रुपन्देही लगेर बयान लिइएको थियो । उनलाई काठमाडौंको कालीमाटीस्थित स्वर्णलक्ष्मी बहुउद्देश्यीय सहकारी संस्थाको रकम अपचलन कसूरमा पनि पक्राउ पुर्जी जारी भएको छ । लामिछानेलाई अनुसन्धानका लागि काठमाडौं ल्याउने तयारी गरिएको छ ।
यस्तै चितवनको साहरा चितवन बहुउद्देश्यीस सहकारी संस्थाको रकम अपचलन गरेको भन्दा लामिछानेसहित १० जनाविरुद्ध सहकारी बचतकर्ताले जिल्ला प्रहरी कार्यालयमा पूरक जाहेरी दिएका छन् ।
