रुसका राष्ट्रपति भ्लादिमिर पुटिनले युक्रेनको पूर्वी सहर ड्निप्रोमा गरेको आक्रमण नयाँ परम्परागत मध्यम दूरीको मिसाइल प्रयोग गरेर गरिएको बताउनु भएको छ ।

युक्रेनले अमेरिका र बेलायतबाट प्राप्त लामो दूरीका हतियार प्रयोग गरी रुसभित्रका लक्ष्यमा आक्रमण गरेको प्रतिक्रियास्वरूप प्रहार गरिएको रुसले बताएको छ ।

आफना हतियार युक्रेनलाई दिने देशका सैन्य केन्द्रहरुमा पनि आक्रमण गर्ने पुटिनले चेतावनी दिनुभयो । अमेरिका र बेलायतले अमेरिकी एटीएसीएमएस र बेलायती स्टर्म श्याडो मिसाइलहरूको प्रयोगको अनुमति दिएका थिए ।

युक्रेनी राष्ट्रपति भोलोडिमिर जेलेन्स्कीले रुसले नयाँ मिसाइल प्रयोग गर्नु युद्धको स्तर र क्रूरतामा स्पष्ट र गम्भीर वृद्धि भएको बताउनु भएको छ । रुस शान्तिमा कुनै चासो राख्दैन भन्ने यसको प्रष्ट संकत हो उहाँले भन्नुभएको छ ।

जेलेन्स्कीले यो मिसाइललाई अन्तरमहादेशीय ब्यालिस्टिक मिसाइलको विशेषतासँग तुलना गरे पनि पश्चिमी अधिकारीहरूले स्वीकार गरिसकेका छैनन । अमेरिकी राष्ट्रिय सुरक्षा परिषद्ले प्रयोगात्मक मध्यम दूरीको ब्यालिस्टिक मिसाइल युक्रेनविरुद्ध प्रयोग गरिएको जनाएको छ ।

अमेरिकी पेन्टागनकी उपप्रवक्ता सब्रिना सिंहले मिसाइल प्रक्षेपणको बारेमा न्युक्लियर जोखिम न्यूनीकरण च्यानल मार्फत छोटो सूचना प्राप्त भएको जानकारी दिनुभयो ।
पुटिनले गैर परमाणु हाइपरसोनिक ब्यालिस्टिक मिसाइलको सफल परीक्षण गरिएको र लक्ष्य प्राप्त भएको दाबी गर्नुभएको छ ।

रुसि सैन्य अनुसन्धानका निर्देशक म्याथ्यु साभिलका अनुसार यो मिसाइलको दायरा अहिले सम्म प्रयोग भएका इस्कान्डर मिसाइलहरूको भन्दा लामो भएको देखिन्छ । जसको दायरा ५०० किलोमिटर सम्म छ ।

युद्ध १ हजार औं दिन पार गर्दै नयाँ खतरनाक चरणतर्फ अघि बढिरहेको छ । पुटिनको यो घोषणा पश्चिमी देशहरूले युक्रेनलाई थप सैन्य सहयोग उपलब्ध गराइरहेको समयमा आएको हो ।

Source : https://www.khasokhas.com/211773