कार्यकाल सकिनै लाग्दा नयाँ लाइसेन्स बाँड्ने तयारीमा बीमा प्राधिकरण, ‘करोडौँको चलखेल’
काठमाडौँ । नेपाल बीमा प्राधिकरणका अध्यक्ष सूर्य सिलवालको कार्यकाल सकिन अब दुई महिना बाँकी छ । तर, अध्यक्षको कार्यकाल सकिनै लाग्दा बीमा प्राधिकरण नयाँ लाइसेन्स बाँड्ने तयारीमा छ ।
प्राधिकरणको उच्च स्रोतले दिएको जानकारी अनुसार अध्यक्षकै निर्देशन र पहलमा नयाँ जीवन र निर्जीवन बीमा कम्पनीको लाइसेन्स बाँड्ने तयारी सुरु भएको छ ।
यसो त सूर्य सिलवालको कार्यकालमा यसअघि सातवटा लघुबीमा कम्पनीले लाइसेन्स पाएका थिए । ती कम्पनीहरुले लाइसेन्स पाएको दुई वर्ष पनि पूरापूर पुगेको छैन । सिलवालले आफ्नै कार्यकालमा तीन वर्षअघि पनि हिमालयन रि इन्स्योरेन्सलाई लाइसेन्स दिएका थिए । तर, प्राधिकरणका अध्यक्ष फेरी नयाँ लाइसेन्स बाँड्ने तयारीमा लागेका छन् ।
कार्यकालको अन्तिम समयमा अध्यक्ष नयाँ लाइसेन्स दिने तयारीमा लागेपछि केही व्यापारिक घराना पनि दौडधुपमै छन् । स्रोतका अनुसार बीमा कम्पनीको नयाँ लाइसेन्स लिने दौडमा चौधरी ग्रुप र शंकर ग्रुप छन् । यी दुई ग्रुपले दुईवटा जीवन र दुईवटा निर्जीवन बीमा कम्पनीको लाइसेन्सका लागि दौडधुप सुरु गरेको बुझिएको छ । जसमध्ये चौधरी ग्रुपले त स्ट्याण्डर्ड लाइफ इन्स्योरेन्स नामक कम्पनी नै खडा गरेर लाइसेन्सका लागि यसअघि नै जोडबल गरिसकेको थियो ।
बीमा क्षेत्रले बिजनेश नपाइरहेको अवस्थामा बीमा प्राधिकरणले फेरी नयाँ लाइसेन्स बाँड्ने तयारी गरेपछि यसमा करोडौँको चलखेल भएको चर्चा सुरु भएको छ । यसो त इन्स्योरेन्स कम्पनीको संख्या धेरै हुँदा बिजनेश नपाएको भन्दै सिलवालले २०७८ चैतमा इन्स्योरेन्स मर्जरको नीति लिएका थिए । तर, हाल नयाँ लाइसेन्स बाँड्ने तयारीमा प्राधिकरण लागेपछि यसले आर्थिक चलखेल भएको विषयलाई थप बल दिएको जानकारहरुले बताएका छन् ।
हाल नेपाली बीमा क्षेत्रमा लघुबीमा बाहेक १४ वटा जीवन बीमा र १४ वटा निर्जीवन बीमा कम्पनी रहेका छन् ।
