स्वस्तिमा फेस अफ कर्णाली याक्स
काठमाडौं ।
नायिका स्वस्तिमा खड्का हिमालयन विल्डर्स एन्ड इन्जिनियर्सको स्वामित्वमा रहेको कर्णाली याक्समा फेस अफ कर्णाली याक्सको रूपमा आबद्ध भएकी छिन्।
हालै राजधानीमा पत्रकार सम्मेलन गर्दै कर्णाली याक्सले आगामी नेपाल प्रिमियर लिग (एनपीएल) का लागि खड्कालाई आबद्ध गरेको जनायो। स्वस्तिमाले कर्णाली प्रदेश फरक संस्कृति, रहनसहन र वातावरणसँगै क्रिकेटबाट पनि चर्चामा रहने बताइन्। उनले नेपाली क्रिकेट विश्वस्तरमा चिनिँदै गएको चर्चा पनि गरिन्।
‘अहिले खेलकुदको माध्यमबाट हरेक राष्ट्रले आफूलाई चिनाउँदै गएका छन्। नेपालमा पनि क्रिकेटको प्रभाव बढ्दै गएको छ,’ स्वस्तिमाको भनाइ थियो, ‘कर्णाली याक्सले नेपाली क्रिकेटलाई विश्वमाझ पुर्याउने योजना ल्याएको छ। त्यसैको प्रभावले कर्णाली याक्ससँग जोडिन पुगेकी हुँ। उनले आफ्नो निर्देशक तथा अभिनेता पति निश्चल बस्नेत कर्णाली प्रदेशकै भएकाले पनि कर्णाली याक्ससँग जोडिन सहज भएको बताइन्।
कार्यक्रमबाटै कर्णाली याक्सको गीत सार्वजनिक गरिएको छ। गीतमा हिमालयन विल्डर्स एन्ड इन्जिनियर्सका उपाध्यक्ष सुजन खनालको स्वर, संगीत र शब्द छ।
